UKaine ‘K9’ Fourie, obekwa kwindawo ephezulu emanqindini, uphinde waphumelela njengokuba enqumamise imbethi-manqindi yaseBotswana, uKutlwano Ogaketse, kumjikelo wesibini kwitumente ebesiyiphathelwe yiBoxing5 Promotions eBox Camp Booysens, eRhawutini, ngoLwesihlanu ebusuku.
Ibisisihlandlo sesithathu ngokulandelelana uFourie, oneminyaka engamashumi amabini anesibini, ephumelelela umlo ngokunqumamisa lowo alwa naye. Wanqumamisa owayesakuba yintshatsheli yoMzantsi Afrika, uLusanda Komanisi, ngoNovemba kunye nembethi-manqindi yaseZimbabwe, uLancelot Moyo, ngoJulayi nyakenye.
UTristan Truter unqumamise uFaustin Bukasa waseDemocratic Republic of Congo (DRC) kumjikelo wesihlanu, logama uBheki Maitse ethe qwakaqwaka u-Awonke Tini kumjikelo wesithathu, waze u-Ishmaeel Kadri wanqumamisa u-Itumeleng Tsholo kumjikelo wesithandathu.
Kusenjalo, usaqhuba kakuhle uJoshua Feldman njengokuba ephumelele umlo wakhe wesithathu kwemithathu emva kokubetha uSibusiso Muteleni kumjikelo wesibini, waze uLukhuxolo Mabece wabetha u-Andile Majozi ngamanqaku.
