UMandla Ntlanganiso akanaxhala, kwaye akoyiki ngokoyikiswa njengokuba iNational Professional Boxing Promoters Association (NPBPA) iqinisa idabi layo kwilinge lokumshenxisa kwisikhundla sokuba ligunya eliyintloko kwaBoxing South Africa (BSA). 

UMphathiswa weZemidlalo, uZizi Kodwa, wonyule uNtlanganiso njengegunya eliyintloko kwaBSA kulenyanga ephelileyo. Esisigqibo sashiya iinkokheli zeNPBPA zitshixizelelwa ngamazinyo njengokuba zingafuni nokumbona uNtlanganiso. 

Kudliwanondlebe nenkqubo iTKO Boxing Magazine kuSABC 2, uNtlanganiso uyibeke yacaca eyokokuba yena akanadyudyu, kwaye uzimisele ukuwasebenzela amanqindi oMzantsi Afrika.

“Asigungqi, asijiki, kwaye sijonge phambili, sizimisele kananjalo. Siyazi ngqo into esiyenzayo. Sifuna ukubuyisela amanqindi kulanto akhe ayiyo ngaphambili, kwaye yiyo kanye into esizakuyenza,” uNtlanganiso uphefumle watsho kwiTKO Boxing Magazine ngoLwesihlanu ngokuhlwa.

UNtlanganiso, oyinzalelwane yaseMdantsane eMpuma Koloni, waqalisa ukusebenzela uBSA njengegosa lezemisebenzi ngoJanuary ka-2022. 

Leave a Reply

Your email address will not be published. Required fields are marked *

css.php