Izakuba lidabi lamava nolutsha xa udizadala kade bemkhwahlaza, uthambodala kade bemqongqotha, nowayesakuba yinjinga yoMzantsi Afrika kudidi lwempukane, uThembelani Nxoshe waseMdantsane, evavanywa amanqindi akhe xa esilwa negatyana uMoyisi Booi kulenyanga ezayo.
UNxoshe uzakube ekhusela isithsaba sakhe saseMpuma Koloni kudidi lwempukane ngethuba equbisana noBooi, owayeyinto ngobunto bayo kudidi lwabangahlawulwayo, kwitumente yeX Promotions ezakubanjelwa eWhittlesea Multipurpose Hall, eSada, ngoMgqibelo umhla weshumi elinesithathu kuTshazimpuzi, u-Epreli ngabula makhumsha.
Izakuba ngumlo wokuqala kaNxoshe ukususela ngamini ilinge lakhe lokuba yintshatsheli yoMzantsi Afrika kudidi lwempukane isihlandlo sesibini laphanzayo ebethwa ngamanqaku nguJackson Chauke, okungoku nje eyinjinga ye-International Boxing Organisation (IBO) kudidi lwempukane, e-Orient Theatre, eMonti, ngo-Okthobha wonyaka ophelileyo.
Kusenjalo, uBooi uyiphumelele yomibini imilo yakhe, omnye walemilo waphela esithubeni njengokuba wanqumamisa uMasivuye Philiso kumjikelo wesibini e-Orient Theatre ngo-Okthobha nyakenye.
