Ukuba ebenokunikwa ilungelo lokuzikhethela, uBeaven Sibanda, oyimbethi-manqindi engekabethwa neyazalelwa eZimbabwe, ebezakukhetha ukulwa noSiyakholwa Kuse waseMdantsane.
Nangona nje uSibanda esithi yonke into isezandleni zabaphathi bakhe, akakhange ayifihle eyokokuba yena unqwenela ukuqubisana noKuse, oyintshathseli yoMzantsi Afrika ne-African Boxing Union (ABU).
“Liyinene elokokuba kwakufanele ukuba mna noKuse salwa kulonyaka ophelileyo. Ndinabaphathi abatsha ngoku, ngabo abazakuceba indlela yam. Kodwa ke nawuphi na umlo ndiyawuthakazelela, ingakumbi xa ingowomntu obekwa kwindawo engaphezulu kweyam. Ewe, ndingathanda ukulwa noKuse. Andinakuze ndiwuthabathe umlo ukuba ndiyayazi soze ndiwuphumelele,” utshilo uSibanda.
USibanda, oneminyaka engamashumi amabini anesibini, uyiphumelele yomithandathu imilo yakhe, wanqumamisa iimbethi-manqindi ezimbini. Lenzalelwane yaseHarare eZimbabwe iqeqeshwa nguVusi Mtolo.
