Azikaqalisi iingxoxo phakathi kwabaphathi benjinga yehlabathi, uSivenathi ‘Special One’ Nontshinga, nenkampu kaChristian ‘The Bomb’ Araneta wasePhilippines.

Oku kubangelwa kukuba i-International Boxing Federation (IBF) yayirhoxisa incwadi eyayigunyazisa ukuba uNontshinga no-Araneta baqalise iingxoxo, baze baziqukumbele ungekafiki umhla wesine ku-Epreli. 

I-IBF yaxelelwa ukuba uNontshinga wamiswa iintsuku ezingamashumi amathathu yiMexico City Boxing and Wrestling Commission, eyayilandela inkqubo esebenza ngayo emva kwemilo.  

UNontshinga, oyintshatsheli ye-IBF kudidi lwejunior-flyweight, onqumamise ummi waseMexico u-Adrian Curiel Dominguez kumjikelo weshumi e-Oaxaca, eMexico, kulenyanga ephelileyo, wabetha u-Araneta ngamanqaku kumlo wabo wokuqala eBoardwalk Hotel, eGqeberha, ngo-Epreli, ka-2021. 

“I-IBF isirhoxisile isigunyaziso sayo ngenxa yokumiswa kukaNontshinga. Ndilindele ukufumana esinye isigunyaziso kuleveki,” utshilo uColin ‘Nomakanjani’ Nathan, ongumqeqeshi kaNontshinga. 

U-Araneta, osinqe siseMandaue, eCebu, kwelasePhilippines, wazuza ithuba lokucela umngeni kuNontshinga emva kokubetha umkhaya wakhe u-Arvin Magramo eCebu City ekuthambekeni kukaJanyuwari. 

Kusenjalo, uNathan udize ukuba ziqhubela phambili iingxoxo neTop Rank malunga nomlo wokuzibekela indawo kumlo we-IBF kudidi losiba ophakathi kukaLerato ‘Lights Out’ Dlamini no-Arnold Khegai wase-Ukraine. 

“Simaxhaphetshu kwiingxoxo malunga nomlo kaDlamini. Iingxoxo zizakuqukunjelwa kungekudala. Ndikholelwa ekubeni uLerato angawuphumelela lomfo,” uqukumbele watsho uNathan. 

Leave a Reply

Your email address will not be published. Required fields are marked *

css.php