UJeff Magagane, owayesakuba yintshatsheli yoMzantsi Afrika kudidi losiba, ufumana ithuba lokulungisa izinto emva kokuphulukana nemilo yakho emibini yokugqibela njengokuba ezakulwa noJonJon ‘Wolverine’ Estrada wasePhilippines kuleveki ezayo.
Emva kokubethwa kabini kwimilo yentshinga, uMagagane, oneminyaka engamashumi amathathu anesithathu, uzakulwa no-Estrada eMaun National Stadium, eBotswana, ngoMgqibelo umhla wamashumi amathathu kuMatshi.
“Liyinene elokokuba ndizakulwa nembethi-manqindi yasePhilippines eBotswana kuleveki ezayo. Sisebenze nzima, silungiselela lomlo,” utshilo uMagagane.
UMagagane wahluthwa intshinga yoMzantsi Afrika nguZolisa Batyi ngethuba emnqumamisa kumjikelo wesibini eNgoako Ramatlhodi Sports Complex eSeshego, ePolokwane, ngoDisemba ka-2022. Waphinda wabethwa kumjikelo wesixhenxe yimbethi-manqindi yase-Angola uPedro Manuel Gomes kumlo wentshinga eyayingenamntu kwi-IBA Intercontinental kudidi losiba eLisbon kwelasePortugal ngoDisemba wonyaja ophelileyo.
Kusenjalo, u-Estrada oneminyaka engamashumi amathathu ananye nozinze ePasay City, eMetro Manila, ulwe izihlandlo ezine kulonyaka ophelileyo – ephumelela kabini, waze waphinda wabethwa kabini.
