Lufikelele esiphelelweni emanqindini uhambo lwembunguzulu lwembethi-manqindi, uHekkie ‘Hexecutioner’ Budler, obeke phantsi kulomdlalo.
UBudler, olwe kudidi lwabahlawulwayo phantse iminyaka engamashumi amabini, ubeliqhawe kumanqindi oMzantsi Afrika, ephumelela iintshinga zehlabathi ezintandathu ingabalwanga ibhanti yeRing Magazine.
Lembethi-manqindi, ezakufinca iminyaka engamashumi amathathu anesithandathu ngoMeyi, ayizange inyeke emva kususela ngamini inqumamisa uMichael Sediane kumjikelo wokuqala ngoJuly ka-2007.
“Ewe, uHex uthabathe umhlala phantsi emanqindini,” uqinisekise watsho uColin ‘Nomakanjani’ Nathan, ogqibe phantse iminyaka engamashumi amabini esebenza nalo wayesakubayintshatsheli yehlabathi.
Umangangam ndigaqile, uBudler utyhutyhatyhutyhe amazwe ngaphaya kwemida yoMzantsi Afrika, ezingela udumo, kwaye wabuyela ekhaya ethwele intshinga.
Ushiya amanqindi emva kokuphumelela imilo engamashumi amathathu anesihlanu, engqengqise amadoda alishumi elinanye engawondlalelanga, logama wabethwa izihlandlo ezintlanu.
Into yokokuba waphumelela iintshinga zehlabathi kudidi lweminimumweight nejunior-flyweight bubungqina bokokuba uBudler ebeyinto ngobunto bayo emanqindini.
UBudler uyeke amanqindi eqokelele iintshinga zeWorld Boxing Association (WBA) kudidi lweminimumweight, i-International Boxing Organisation (IBO) kudidi lweminimumweight, i-IBO junior-flyweight (twice), iWBA ‘Super’ ne-International Boxing Federation (IBF) kudid lwejunior-flyweight.
