IPremier Soccer League (PSL) iyiqinisekisile ngoLwesihlanu emva kwemini imihla neendawo ekuzadlalelwa kuyo imidlalo yamaqela asibhozo okugqibela kwiNedbank Cup.
Iqela elidlala kwiMotsepe Foundation Championship (MFC), i-University of Pretoria, izakwamkela iMamelodi Sundowns kwidabi laseTshwane ngoLwesihlanu umhla weshumi elinambini ku-Epreli.
Lomdlalo wobukhaya phakathi kwalamaqela mabini uzakubanjelwa eLucas Moripe Stadium, e-Atteridgeville, kwintshona yePitoli.
Ngengomso, iStellenbosch FC sizakwamkela iSuperSport United kumabala aseDanie Craven kwiCape Winelands ngentsimbi yesithathu.
Kwiiyure nje ezintathu emva koko, AmaZulu azakuqubisana neentshatsheli ezikhuselayo i-Orlando Pirates eMoses Mabhida Stadium, eThekwini.
Ukanti, iTS Galaxy izakudlala neqela laseGqeberha, iChippa United, kumdlalo wokugqibela wamaqela asibhozo eMbombela Stadium eNaspoti ngentsimbi yesithathu ngeCawa umhla weshumi elinesine.
