UThabiso ‘The Rock’ Mchunu ukholelwa ukuba wenze ngokwaneleyo ukuwuphumelela umlo wakhe nommi wase-Argentina, uYamil Alberto Peralta Jara, e-Olive Convention Centre, eThekwini, ngentseni yangoMgqibelo.
Noxa kunjalo, iziphumo zabagwebi ababini – u-Eddie Pappoe waseGhana noJose Cordini wase-Argentina – zibalisa bali limbi njengokuba bethe uPeralta uphumelele 97-93, 96-94 ngokulandelelana. Ngumgwebi woMzantsi Afrika u-Ishmael Koali kuphela othe uMchunu uphumelele 97-93.
Ngenxa yoko, ufafa olude lwase-Argentina, oluneminyaka engamashumi amathathu anesibini, luphumelele intshinga yeWorld Boxing Council (WBC) Silver ebingenamntu kudidi lwecruiserweight.
“Ndilwe nembethi-manqindi exaka kakhulu. Mhle yena, uyawenza umsebenzi wakhe. Ndiziva ndenze ngokwaneleyo ukuwuphumelela lomlo,” utshilo uMchunu, oneminyaka engamashumi amathathu anesithandathu.
Ibingumlo wokuqala kaMchunu kususela mhla wabethwa ngu-Ilunga Junior Makabu waseDemocratic Republic of Congo (DRC) kumlo weWBC kudidi lwecruiserweight ngoJanyuwari ka-2022.
