Imbethi-manqindi yase-Argentina, uYamil Alberto Peralta Jara, ubatsho bathi cwaka abalandeli bamanqindi eMzantsi Afrika, ebetha intandane uThabiso ‘The Rock’ Mchunu e-Olive Convention Centre, eThekwini, ngenj’ixukuxa ngoMgqibelo.
UPeralta woyise uMchunu ngamanqaku njengokuba abagwebi u-Eddie Pappoe waseGhana nommi wase-Argentina uJose Cordini bethe uphumelele 97-93, 96-94 ngokulandelelana. Umgwebi waseMzantsi Afrika u-Ishmael Koali uthe uMchunu uphumelele 97-93.
Njengokuba luphumelele nje ufafa olude lwase-Argentina luzuze intshinga ebingenamntu yeWorld Boxing Council (WBC) Silver kudidi lwecruiserweight.
Kwaye ke kuyafuneka ukuba mayithethwe eyokokuba noko ibingumlo oyekeyeke lo kungekho nto ebisithi zombini ezimbethi-manqindi ziyafuna ukulwela intshinga yehlabathi.
Kusenjalo, uThulani Mbenge uvuthulule uthuli wabetha uLeandro Ariel Fonseca wase-Argentina ngamanqaku kumlo wengabulazigcawu. Bobathathu abagwebi banqwalile, bevumelana besithi uMbenge wenze kakuhle kulomlo.
