Umqeqeshi nokwangumphathi kaBongani ‘Wonderboy’ Mahlangu, uSandile Mahlangu, ukholelwa ukuba bekuzakubonakala ngathi bayamoyika uMzuvukile ‘Old Bones’ Magwaza ukuba bebengasityikityanga isivumelwano sokulwa naye.
UMahlangu, ozakulwa nommi waseBotswana uTefo Letshikgwane eFairground Holdings, eGaborone, ngoMgqibelo kuleveki ezayo, utyikitye isivumelwano sokukhusela intshinga yakhe yoMzantsi Afrika kudidi lwejunior-featherweight kumlo noMagwaza.
“Sisityikityile isivumelwano sokukhusela intshinga yethu kuMagwaza. Belifikile ixesha lokokuba sisityikitye esisivumelwano kuba bekubonakala ngathi siyambaleka uMagwaza ngokuya ebesikhwaza,” utshilo uSandile.
Ukuba izinto zihamba ngendlela, lomlo apho uMahlangu ezakukhusela khona intshinga yakhe isihlandlo sesithathu, uzakubanjelwa eKapa ngeCawa umhla wamashumi amabini anesithandathu kuMeyi, kwaye sizakuwuphathelwa yiDavid Faas Productions.
Kusenjalo, uMahlangu uzakulwa noLetshikgwane kumlo wentshinga ye-African Boxing Union (ABU) kudidi lwejunior-featherweight kwitumente yeBond Boxing Promotions ekhokelwa nguBond Ngubula.
Ngokokutsho kukaSandile, abakwaMahlangu bazakwenjenjeya ukusingisa eBotswana ngoLwesibini weveki ezayo.
