Zivale ngoLwesihlanu weveki ephelileyo izicelo zokufuna umsebenzi wokuba ngabaphathi bakwaBoxing South Africa (BSA) kumaphondo amane kwelilizwe.
Eligunyabantu lamanqindi libhengeze ukuba kuvuleleke izikhundla eMpuma Koloni, KwaZulu-Natal, eNtshona Koloni naseMntla Koloni. Izakuba ngumntu omnye ozakuphatha eNtshona naseMntla Koloni.
Ukubheka phambili, iMpuma Koloni izakuba ngaphantsi komlawuli omnye. Okwangoku, iMpuma Koloni inabalawuli ababini, uPhakamile Jacobs, ophethe kwingingqi yeBorder, noNceba Dladla olawula kwi-Eastern Province.
UMike Dube nguye ophetheyo KwaZulu-Natal, logama uMzoli Tempi exhuzula imikhala eNtshona Koloni. Ukanti, uMntla Koloni usephantsi kukaHloks Ramagole, okwangumlawuli waseGauteng.
Njengokuba umhla wokuvala ufike waphinda wadlula, bazakulinda ngomonde abalandeli bamanqindi befuna ukubona ukuba kuzakubakho ubuso obutsha kusini na kulamaphondo amane.
