IChippa United iphumelele okokuqala kwimidlalo emithathu njengokuba iquthise iCape Town Spurs ngamanqaku amabini eqandeni kumdlalo weDStv Premiership eNelson Mandela Bay Stadium, eGqeberha, ngokuhlwa kwangoLwesithathu.
IiChilli Boys, eziye kulomdlalo emva kokubethwa kwimidlalo emibini, bezinkqenkqeza phambili ngenqaku likaSinoxolo Kwayibe, alifake ngomzuzu wamashumi amabini anesithandathu.
Kanye kwimizuzu emine ngaphambi kokuphela komdlalo, uKayden Francis ufake inqaku lesibini eliqinisekise impumelelo yeliqela laseGqeberha.
Kusenjalo, iMoroka Swallows ne-Orlando Pirates zibambene ngenqaku elinye macala kwidabi laseSoweto eDobsonville Stadium.
IiDube Birds zintingele phezulu ngethuba uLindokuhle Mtshali efaka inqaku ngomzuzu wamashumi amabini anesixhenxe. UPatrick Maswanganyi ulinganise amanqaku ngemizuzu esibhozo siqamile isiqingatha sesibini.
Ezinye iziphumo:
TS Galaxy 3 Royal AM 0
Lamontville Golden Arrows 2 SuperSport United 2
