UStanley Nwabali angakhululwa nanini na yiChippa United ukuba kungabakho iqela elimfunayo apha ekhaya okanye phesheya kolwandle, nelinokumnika nantoni ayifunayo.
Esi sisiqinisekiso esivela kusihlalo weeChilli Boys, uSiviwe ‘Chippa’ Mpengesi, njengokuba lonozinti oneminyaka engamashumi amabini anesixhenxe esoyanyaniswa namaqela aliqela emva kokudlala kakuhle kwitumente yamazwe ngamazwe ase-Afrika e-Ivory Coast phakathi kukaJanyuwari noFebruwari kulonyaka.
“Kukho abantu esithetha nabo phesheya. Kwaye sikholelwa ukuba ufanelwe kokuhle kodwa, ingakumbi emva kokudlala kakuhle kwitumente ye-AFCON. Ukuba ke liyavela ithuba, ingakumbi phesheya, nkqu nalapha ekhaya, elimnika into entle, soze sale ukumkhulula,” utshilo uMpengesi.
UNwabali akakhange adlale ngethuba iiChilli Boys zibetha iKaizer Chiefs ngamanqaku amabini eqandeni eBuffalo City Stadium, eMonti, emva kwemini ngoMgqibelo kuba ebefumene amakhadi amthubi amane. UDarren Johnson uye wadlala kwizinti zeeChilli Boys.
