Emva kokubuya ngemva wabetha obeyintshatsheli yephondo uLuvuyo Mputi kumlo owawumhle kakhulu ngoMatshi, ngoku uChumani ‘AK 47’ Tunzi uzakulwa nentshatsheli yamhlamnene eMzantsi Afrika u-Aphiwe ‘Swagger’ Mboyiya.
UTunzi uzakube eyikhusela okokuqala intshinga yakhe yaseMpuma Koloni kudidi lwejunior-welterweight xa equbisana noMboyiya eMonti ngoMgqibelo umhla wamashumi amathathu ananye ku-Agasti.
“UTunzi uzakulwa no-Aphiwe Mboyiya ngo-Agasti, kwaye uzakube ekhusela intshinga yakhe yaseMpuma Koloni,” utshilo uBaba ‘Babes’ Makala, oqeqesha uTunzi.
UTunzi wavuka wazivuthulula emva kokuwiswa kabini, waze wanqumamisa uMputi kumjikelo wesithandathu kowona mlo owawumhle kakhulu kwitumente yeKay B Boxing Promotions e-Orient Theatre, eMonti, ngoMatshi.
Inxele uMboyiya, ozinze e-Amalinda, eMonti, wayeyintshatsheli yoMzantsi Afrika kudidi losiba nolwejunior-lightweight.
Kusenjalo, uLuvuyo Sizani wakuKomani uzakuvana amandla noVuyani Kosana kumlo wentshinga engenamntu eMzantsi Afrika kudidi lwelight-heavyweight. – Monwabisi Jimlongo
