Zifikelele esiphelweni iintsuku zokunyuka esehla kowayeyinjinga yoMzantsi Afrika kudidi lwejunior-flyweight uNhlanhla ‘Mount Kilimanjaro’ Tyirha njengokuba ezimanye ne-All Winners Boxing Club eMdantsane.
UTyirha ufumene ikhaya elitsha emva kokuqhawula amatyathanga ebembophelele kumlawuli wakhe uThembelani ‘Shakes’ Hlombe, waze wayokuzimanya noMlandeli Tengimfene.
“Sidibene, saze savuma ukusebenza kunye ngaphantsi kwemiqathango engqongqo,” utshilo uTengimfene, owaphumelela imbasa ye-2017 Manager of the Year.
UTengimfene, ongumlawuli wase-All Winners Boxing Club, unendumasi yokunceda ekuvuseni isakhono seembethi-manqindi njengokuba esebenza nazo ngenyameko nomonde.
UTyirha uzakuqeqeshwa ngowayeyintshatsheli yoMzantsi Afrika kudidi lwempukane uMakazole Tete encediswa nguThemba Mali njengokuba ese-All Winners Boxing Club nje. – Monwabisi Jimlongo
