Ulibazisekile umlo ka-Amzolele ‘Globe’ Dyeyi waseMdantsane obuzakuba ngowokuqala kudidi lwabahlawulwayo emva kokumiswa kwetumente ebizakubanjwa kuleveki ezayo.
UDyeyi, owaphumelela imbasa yesilivere kutsha nje kwitumente yeMandela African Boxing Cup e-Inkosi Albert Luthuli International Convention (ICC) eThekwini, ebezakulwa noLoyiso Basayi ngomhla wamashumi amabini anesine kuMeyi.
Letumente ebesizakuyiphathelwa yiFantastic 2 Boxing Promotions eKibler Park Recreation Centre iyakuphinda ibanjwe ngomhla oyakuphinda ubhengezwe.
“Andinangxaki nokumiswa kwaletumente. Besele ndikulungele ukulwa njengokuba ndihlala ndisemandleni okulwa. Ukuthabatha inxaxheba kwiMandela Cup kundincedile ekubeni ndihlale ndisemandleni,” utshilo uDyeyi.
UDyeyi, oneminyaka engamashumi amabini anesibini wayesakuqeqeshwa nguZolile ‘Gqo’ Mahambi in Mdantsane, kwaye ngoku uqeqeshwa nguKhangelani Jack, owaphumelela imbasa ye-2023 Trainer of the Year, eGauteng. – Monwabisi Jimlongo
