USikho ‘Sequence’ Nqothole uzakunikela umva uMzantsi Afrika entingela eMexico ngeenjongo zokuzekamzweni kwinto eyenziwa yintshatsheli ye-International Boxing Federation (IBF) kudidi lwejunior-flyweight uSivenathi ‘Special One’ Nontshinga owabuya kwelalizwe lombini Melika ephethe intshinga yehlabathi ngoFebruwari.
Lenzalelwane yaseMthatha, eneminyaka engamashumi amabini anethoba, izakulwa nommi waseMexico uRene Calixto Bibiano ongekabethwa ngoMgqibelo umhla wamashumi amabini anesihlanu kuMeyi (NgeCawa umhla wamashumi amabini anesithandathu ngokwexesha loMzantsi Afrika).
UCalixto, oyiphumelele yonke imilo yakhe engamashumi amabini anesibini, enqumamise amadoda alithoba, uzakuqubisana noNqothole, oqeqeshwa nguPhumzile ‘Sweet Chocolate’ Matyhila, owayeyintshatsheli yentambanani eMzantsi Afrika.
UNqothole ubekwa kwindawo yeshumi elinambini kwiWorld Boxing Association (WBA), kwindawo yesibhozo kwi-International Boxing Federation (IBF) nakwindawo yesihlanu kwiWorld Boxing Organisation (WBO).
Kwelinye icala, uCalixto waseGuerrero lwelaseMexico, onqumamise iimbethi-manqindi ezimbini kwimilo yakhe emihlanu yokugqibela, ubekwa kwindaw yeshumi elinanye yiWBA. UCalixto uyiphumelele yonke imilo yakhe engamashumi amabini anesibini, engqengqisa amadoda alishumi elinanye. – Monwabisi Jimlongo
