Unozlnti weMamelodi Sundowns uRonwen Williams unethemba lokokuba iiBrazilians zizakuvala isizini zingakhange zibethwe nakumdlalo omnye.
Ezinkunzi zaseTshwane, ezidlala neCape Town City kumdlalo wazo wamashumi amathathu kwiDStv Premiership, sele ziphumelele imidlalo engamashumi amabini anesibini, zadlala ngokulingana kwesixhenxe.
“Ibeyisizini entle nemangalisayo, ingakumbi kwiligi. Senze kakuhle kakhulu. Besimangalisa isizini yonke. Ukuphumelela rhoqo bekungundoqo, ukunganikezeli kwethu, ubudlelwane phakathi kwethu nomoya wokulwa isizini yonke,” utshilo uWilliams.
Ngokwakumdlalo neeCitizens, uWilliams, oneminyaka engamashumi amathathu anesibini, uthe: “Lomdlalo unezinto zonke ezinkulu. Ukuba siphumelele, sizakubizwa njengoomakhonya eMzantsi Afrika, yinto enkulu leyo. Ndiyayazi ukuba sikufanele oku. Ukusebenza nzima, kwakunye nokuzinikela isizini yonke, kuyakufaneleka ukuba siqukumbele isizini ngempumelelo, ingakumbi ngaphambi kwabalandeli bethu.”
UWilliams, owayedlalela iSuperSport United, udlale kakuhle kakhulu kulesizini. Ubungqina boko kukuba abekuluhlu lwabadlali abangaphumelela iwonga leFootballer of the Season, elePlayers’ Player of the Season neleGoalkeeper of the Season. – Monwabisi Jimlongo
