Umqeqeshi wamanqindi uPhumzile ‘Sweet Chocolate’ Matyhila ukholelwa ukuba imbethi-manqindi yakhe uSikho ‘Sequence’ Nqothole wenze ngokwaneleyo kumlo wakhe noRené Calixto Bibiano waseMexico, kodwa abagwebi babenezinye iingqondo.
UCalixto usabambelele kwirekhodi lakhe lokungabethwa emva kokuphumelela ngamanqaku ebetha uNqothole eGimnasio de Box Jiquipilco, eMexico, ngentseni yangeCawa, ngokwexesha loMzantsi Afrika.
Bobathathu abagwebi bathe uCalixto, obekwa kwindawo yeshumi elinanye yiWorld Boxing Association (WBA) nendawo yeshumi elinesihlanu yiWorld Boxing Organisation (WBO), uwuphumelele lomlo. Abagwebi ababini bathe 96-94, waze owesithathu wathi 98-92.
“Ndicinga ukuba siwuphumelele umlo, kodwa abagwebi bacinge ngolunye uhlobo. Ngekungcono noko ukuba bebethe silwe ngokulinganayo. Inene andiyazi. Mhlawumbi kukuba lomntu ebesisilwa naye engowalapha,” utshilo uMatyhila.
Ngenxa yalempumelelo, uCalixto, oneminyaka engamashumi amabini anethoba, uyiphumelele yonke imilo yakhe engamashumi amabini anesithathu, elithoba eyiphumelela ngokunqumamisa amadoda.
Ngakwelinye icala, uNqothole, okwindawo yeshumi elinambini kwiWBA, olele isibhozo kwi-International Boxing Federation (IBF) nokwiendawo yesihlanu kwiWBO, uphumelele imilo elishumi elinesibhozo, wabethwa kwemithathu. – Monwabisi Jimlongo
