Inqaku elifakwe nguRelebohile Mofokeng kwixesha likasompempe liye labaluleka kakhulu ngethuba i-Orlando Pirates ikhusela iNedbank Cup ngokubetha iMamelodi Sundowns ngamanqaku amabini kwelinye eMbombela Stadium, eNaspoti, ngoMgqibelo.
Isiqingatha sokuqala siphele iliqanda macala omabini emva kokuba uSipho Chaine ebeliqhawe ngokubamba ibhola kaLucas Ribeiro Costa ebisuka echaphazeni ngomzuzu weshumi. Usompempe womdlalo uSikhumbuzo Gasa walathe echaphazeni emva kokuba uKhuliso Mudau edlalwe kakubi nguDeon Hotto.
Iinkunzi zaseTshwane ziphale phambili ngenqaku elifakwe ngukapteni wazo uThemba Zwane kwibhola ebisuka kuRibeiro ngemizuzu elithoba siqalile isiqingatha sesibini.
IiBuccaneers zifake elokulinganisa ngequza likaPatrick Maswanganyi ebetha unozinti weSundowns uRonwen Williams ngebhola ebisuka echaphazeni ngomzuzu wamashumi asixhenxe ananye. UGasa walathe echaphazeni emva kokuba u-Aubrey Modiba edlale uMaswanganyi kakubi.
Xa kanye uGasa ebelungiselela ukuvuthela impempe ukuya kwixesha elongezelelweyo, uMofokeng ujikajike uBongani Zungu ngaphambi kokukhaba ibhola egqithe kuWilliams yangcangcazelisa umnatha.
