Kubonakala ngathi ngahle ayithi xibilili intshinga yoMzantsi Afrika kudidi lwejunior-bantamweight uPhumelela ‘The Truth’ Cafu njengokuba ezakujongana nokulwa kwinqanaba lamazwe ngamazwe kukhula namathuba okulwela intshinga yehlabathi.
UCafu, oneminyaka engamashumi amabini anesihlanu, uzibandakanye nomqeqeshi ozinze eRhawutini uColin ‘Nomakanjani’ Nathan neNO DOUBT Management ngoLwesihlanu.
“Sisezokuhlala phantsi, sithethe ngayo intshinga yoMzantsi Afrika. Sizakuhlahla indlela ebheka phambili,” utshilo uNathan.
Lenzalelwane yaseDuncan Village yaphumelela intshinga yoMzantsi Afrika emva kokunqumamisa u-Enathi Stelle kwimizuzwana engamashumi amabini anesithandathu e-International Convention Centre (ICC), eMonti, ngoDisemba kulonyaka ophelileyo.
UCafu ubekwa kwindawo yeshumi elinanye yiWorld Boxing Council (WBC), ulele isixhenxe kwiWorld Boxing Association (WBA), kwindawo yesine kwi-International Boxing Federation (IBF) nakwindawo yesithathu kwiWorld Boxing Organisation (WBO). – Monwabisi Jimlongo
