I-Orlando Pirates ibhengeze ukuba umkile usekela-mqeqeshi wayo uSergio Almenara ebuyela eYurophu ngoMvulo.
Ekuqaleni, lenzalelwane yaseSpain yayifuna ukuyishiya iPirates ekuthwaseni konyaka, kodwa yakhe yathi chu ilindele kuphele isizini ngokweminqweno yeziphathamandla zeliqela.
“UMnumzana u-Almenara wayefake isicelo sokulahla emsebenzini ekuthwaseni kwalonyaka, kodwa kwilinge lokubona inkqubela phambili yeliqela abaphathi bagqiba kwelokokuba basihoye isicelo sakhe ekupheleni kwesizini,” iPirates itshilo ngoMvulo.
U-Almenara, ohleli iisizini ezimbini kwiPirates, uthe uthabathe isigqibo sokumka kweliqela laseSoweto ngenxa yezizathu zosapho lwakhe.
“Esi sisigqibo endisithabathe ngentliziyo ebuhlungu. Bendibonwabele ubukho bam apha, kodwa ngelishwa, ngenxa yezizathu zam, andikwazi ukuqhubela phambili nomsebenzi wam. Ndinosapho oluselula kwelaseFinland. Bebengakwazi ukuzokuhlala nam kwelilizwe. Ndinqwenela kunge kanti bendihleli ithuba elide, kodwa ke ngelishwa akunakwenzeka oko,” utshilo u-Almenara.
