Kanye nje emva kweentsuku ezimbalwa etyikitye isivumelwano solawulo seminyaka emibini neNO DOUBT Management kaColin ‘Nomakanjani’ Nathan, uSimnikiwe Bongco sele enomlo azakuwulwa no-Ashington Ziwakaya waseZimbabwe.
Lembethi-manqindi eneminyaka engamashumi amabini anesibini neqeqeshwa nguShannon Strydom izakulwa noZiwakaya, onomlo omnye, eBox Camp eBooysens, eRhawutini, ngoMgqibelo umhla weshumi elinesithathu kuJulayi.
UBongco, oyinzalelwane yaseDuncan Village, eMonti, uzakuya kulomlo emva kokuqokelela uthotho lweembasa ngethuba esalwa kudidi lwabangahlawulwayo. Kwaye uBongco ubonwa njengembethi-manqindi yangomso eMzantsi Afrika.
Kusenjalo, uZiwakaya, oneminyaka engamashumi amabini anesithathu, yinzalelwane yaseKwekwe kwiphondo leMidlands eZimbabwe. Wenza kakuhle ephumelela umlo wakhe wokuqala kudidi lwabahlawulwayo ngoSeptemba kulonyaka ophelileyo.
