UNtethelelo Nkosi ulinde ngomonde njengokuba esithi ulindele ukuqinisekiswa komhla azakulwa ngawo noSanele Msimang kumlo wentshinga yoMzantsi Afrika kudidi lwejunior-welterweight, mlo lowo udibanisa iimbethi-manqindi zaKwaZulu-Natal.
Izakuba kokokuqala uNkosi, oqeqeshwa nguDamien Durandt eRhawutini, ekhusela lentshinga yoMzantsi Afrika awayiphumelela kulonyaka ophelileyo.
“Sisalindele ukuqinisekiswa kosuku lomlo. Ekuqaleni, lomlo ububekelwe uJuni, waphinda wamiselwa uJulayi. Ndikulungele ukulwa noMsimang,” utshilo uNkosi.
UNkosi, oneminyaka engamashumi amabini anesixhenxe noyinzalelwane yaseMtubatuba, waphumelela lentshinga ngethuba enqumamisa uPrince Dlomo kumjikelo wethoba ngoNovemba kulonyaka ophelileyo.
UDlomo, oyinzalelwane yaseMgungundlovu, wayezama ukukhusela lentshinga isihlandlo sesihlanu ngokulandelelana. – Monwabisi Jimlongo
