Ngelingeni ude wabekwa umhla womlo apho uNtethelelo Nkosi ezakukhusela intshinga yoMzantsi Afrika kudidi lwejunior-welterweight xa esilwa noSanele Msimang kumlo okuzakuqhizana iimbethi-manqindi zaKwaZulu-Natal.
Eqeqeshwa nguDamien Durandt eRhawutini, uNkosi uzakube eyikhusela okokuqala lentshinga awayiphumelela ngethuba enqumamisa uPrince Dlomo kumjikelo wethoba ngoNovemba kulonyaka ophelileyo.
“Lomlo uzakwenzeka ngo-Agasti. Andikwazanga ukulinda ndizobona uNkosi esilwa. Udinga imilo emibini okanye emithathu ngaphambi kokuba ayokulwa kwizinga lamazwe ngamazwe,” utshilo uDurandt.
Lomlo phakathi kwalenzalelwane yaseMtubatuba, eneminyaka engamashumi amabini anesithathu, noMsimang waseNtshanga uzakwenziwa yiGolden Gloves ngoMgqibelo umhla wesithathu ku-Agasti.- Monwabisi Jimlongo
