Imbethi-manqindi enemilo emibini izakwamkela u-Amzolele ‘Globe’ Dyeyi waseMdantsane kudidi lwabahlawulwayo kumlo wangoMgqibelo.
UDyeyi uzakuvana amandla noJudas Sithole, obethiweyo kwimilo yakhe emibini, emva kokhulula ivest njengokuba bezakulwa kudidi lwentambanani eKibler Park Recreation Centre, eRhawutini.
“Ndihlala ndikulungele ukulwa rhoqo xa ndinomlo. Ndiyavuya njengokuba ngelingeni ndizakulwa okokuqala kudidi lwabahlawulwayo,” utshilo iDyeyi.
Ekuqaleni, uDyeyi, owaphumelela imbasa yesilivere kwitumente ye-2024 Mandela African Boxing Cup eyayibanjelwe e-Inkosi Albert Luthuli International Convention (ICC) eThwekwini kwiinyanga ezimbini ezigqithileyo, wayezakulwa noLoyiso Basayi.
Lomfana oneminyaka engamashumi amabini anesibini wayeqeqeshwa nguZolile ‘Gqo’ Mahambi eMdantsane, ngoku uphantsi kwesandla sikaKhangelani Jack, owaphumelela iwonga le-2023 Trainer of the Year. – Monwabisi Jimlongo
