Umthelekisi waseTanzania uSadah Kasonso weKemmon Sports Agency uphumelele kwilinge lakhe lokucenga uThabo Sonjica waseDuncan Village, eMonti, ukuba abuyele eqongeni emva kwiminyaka eliqela wagqibela ukulwa.
USonjica, owagqibela ukulwa ngo-2015, uzakulwa nembethi-manqindi yaseTanzania u-Abeid Zugo, ogama lipheleleyo lingu-Abeid Kessy Kasongo, eDar-Es-Salaam kwelaseTanzania ngoMgqibelo umhla wamashumi amabini kuJulayi.
UZugo yilambethi-manqindi ibinqumamise injinga yamhlamnene kwi-International Boxing Federation (IBF) ne-International Boxing Organisation (IBO) kudidi lweminimumweight uNkosinathi ‘Mabhere’ Joyi ngoMeyi. UZugo wayebethe ngamanqaku uSimphiwe ‘V12’ Vetyeka, owayeyintshatsheli yeWorld Boxing Association (WBA) ne-IBO kudidi losiba, ngoDisemba kulonyaka ophelileyo.
Kusenjalo, enye imbethi-manqindi yaseMpuma Koloni neyayiyinjinga yoMzantsi Afrika kudidi lwejunior-bantamweight uSabelo Ngebiyana uzakulwa noFadhili Majiha, owabetha uBongani Mahlangu ngo-Okthobha kulonyaka ophelileyo.
