Kugquba umoya wokoneliseka nokukhululeka njengokuba iChippa United izakuphinda idlale imidlalo yasebusuku eBuffalo City Stadium, eMonti, ukususela kulesizini ezayo.
Emva kokuba iChippa Holdings yenze umsebenzi omhle wokuvuselela ngokutsha iBuffalo City Stadium, iiChilli Boys ziye zabuyela phaya zadlala eminye yemidlalo yazo kulesizini ephelileyo, kodwa azikhange zikwazi ukudlala imidlalo yasebusuku ngenxa yomcelimngeni wokungasebenzi kwezibane.
Ngaphambili, iiChilli Boys zadlala imidlalo yasebusuku kwelibala elise-Arcadia zingekafudukeli eSisa Dukashe Stadium, eMdantsane, ngaphaya kweesizini ezintlanu ezagqithayo.
“Sele kumbovu zilunge izinto ngokubhekiselele kwizibane zasebusuku. Zizakukhanyisa kungekudala. Sizakudlala phakathi kwemidlalo emihlanu nesixhenxe eMonti kulesizini ezayo,” utshilo uLukanyo Mzinzi, ongumqondisi weeChilli Boys.
Kusenjalo, eliqela elizinze eGqeberha belizakuphehlelela ijezi yalo entsha ngoLwesihlanu umhla wesibini ku-Agasti, kodwa ayizokuba senzeka lonto ngenxa yokuvulwa kwepalamente yaseMpuma Koloni ngalomini leyo. – Monwabisi Jimlongo
