Kushiyeke nje ngaphantsi kwenyanga ngaphambi komlo wakhe noYanga ‘Showtime’ Sigqibo, uRicardo ‘Magic Man’ Malajika umile kwelithi akoyiki nto njengokuba eqhubela phambili namalungiselelo alomlo.
UMalajika uzakulinga ukukhusela intshinga yakhe ye-International Boxing Organisation (IBO) kudidi lwejunior-bantamweight ngempumelelo isihlandlo sesibini xa esilwa noSigqibo e-Emperor’s Palace, eKempton Park, ngoLwesihlanu umhla wamashumi amabini anesithathu ku-Agasti.
“Sisebenza nzima, siziqeqesha, silungiselela lomlo. Ndiqinisekile kwelokokuba andimoyiki. Kwaye andisoze ndithi ndimdelele. Oyena mntu osebenza nzima, ndim ke lowo, uzakuwuphumelela lomlo,” utshilo uMalajika.
Lomfana, oneminyaka engamashumi amabini anesihlanu noqeqeshwa nguManny Fernandes, wabetha uMarcel Braithwaite waseLiverpool ngamanqaku ngethuba ekhusela intshinga yakhe okokuqala eKempton Park kwiinyanga ezintathu ezigqithileyo.
Kusenjalo, sisihlandlo sokuqala uSigqibo, owayeyinjinga yoMzantsi Afrika kudidi lwejunior-bantamweight nosuka eDuncan Village, eMonti, ecela umngeni kwintshinga yehlabathi. – Monwabisi Jimlongo
