USamkelo Frank Sotomela ucela umngeni kwintshatsheli yoMzantsi Afrika kudidi lwempukane uNkosingiphile Sibisi esithi makakhusele intshinga yakhe kuye.
USibisi, oyiphumelele yosibhozo imilo yakhe, uyikhusele ngempumelelo intshinga yakhe ebetha uTheo Nxayiphi waseMpuma Koloni eDundee kulenyanga ephelileyo.
USotomela, obekwa kwindawo yesithathu kudidi lwempukane eMzantsi Afrika, ufuna ukunikwa ithuba lokulwela intshinga kaSibisi.
“Sithumele uxwebhu olucela umngeni ngoLwesihlanu. Batshilo bathi bayifumene imbalelwano yethu. Ngethemba lokokuba uSibisi uzakukhusela kuSotomela,” utshilo uShannon Strydom, oqeqesha uSotomela.
USotomela, owazalelwa eMthatha, wanqumamisa u Thabang Ramagole kumjikelo wesine eBox Camp Booysens, eRhawutini, kwiinyanga ezimbini ezigqithileyo.
