Intlanganiso ibiphakathi kweLast Born Boxing Promotions, iKay B Promotions noSuperSport ebibanjwe ngoLwesibini igqibe ekubeni umlo kaSiyakholwa Kuse noMalaki Sobolo ibengowokuqala kwitumente ezakubanjelwa e-Orient Theatre, eMonti, ngeCawa.
UKuse uzakube ekhusela intshinga yakhe yoMzantsi Afrika kudidi lweminimuweight okokuqala kususela mhla wabetha uBangile Nyangani e-International Convention Centre (ICC), eMonti, ngoJulayi kulonyaka ophelileyo.
Olucwangciso lwemilo luqinisekiswe nguMla Tengimfene weLast Born Boxing Promotions kunye noMzi Booi weKay B Promotions ngoLwesibini. Konke oku kubangelwe luhlelo lwamaxesha kumabonakude.
Kusenjalo, umlo wentshinga yoMzantsi Afrika kudidi losiba phakathi kwentshatsheli ekhuselayo uZolisa Batyi noYamkela Phaliso uzakuba ngowesibini kuletumente.
Umlo ophambili phakathi kwentshatsheli yamhlamnene kudidi losiba u-Azinga ‘Golden Boy’ Fuzile nembethi-manqindi yaseNamibia uSebastianus Natanael, ofike eMonti ngoLwesibini, izakuba ngowesithathu kuletumente.
