Ongasekhoyo nowayeyimbethi-manqindi kudidi lwabahlawulwayo uPhumzile ‘Gamala’ Dubase, olele ubuthongo bokufa ngentseni yangeCawa, uzakubekwa kwikhaya lokulinda ngoMgqibelo umhla wamashumi amathathu ananye ku-Agasti.
Ezinkcukacha malunga nosuku lomngcwabo kaDubase zidizwe nguPhumlani Dubase, obengumninawa kamfi.
UDubase, owayeyimbethi-manqindi eyayisilwa kudidi lwejunior-welterweight, wayengulamndeli omkhulu wamanqindi nesisele senyathi, usutywe kukufa emva kokoyiswa lidabi nomhlaza. Ebeneminyaka engamashumi amahlanu anesithandathu.
“Usapho lugqibe kwelokokuba umngcwabo ubanjwe ngoMgqibelo umhla wamashumi amathathu ananye ku-Agasti,” uqinisekise watsho uPhumlani Dubase, nophinde waveza ukuba inkonzo yesikhumbuzo ingoLwesine kuleveki ezayo.
Umfi waqala ukulwa kudidi lwabahlawulwayo ngo-1986 de wawayeka amanqindi emva kweminyaka esibhozo. UDubase waphumelela imilo elithoba, enqumamisa amadoda amahlanu, wabethwa kwelishumi, waze walwa ngokulinganayo kwimilo emibini.
Emva kokuyeka kwakhe ukulwa ngo-1994, uDubase wagxila ekusebenzeleni iSebe leZempilo njengegosa loncedo lokuqala.
