Akachithanga xesha umthelekisi wamanqindi ophambili eNtshona Koloni uJackie Brice njengokuba etyikitye uLwando Mgabi noSihle Jelwana ukuba balwele intshinga engenamntu eMzantsi Afrika kudidi lwejunior-bantamweight ngoLwesihlanu umhla wamashumi amabini anesixhenxe kuSeptemba.
UBrice weJackie Brice Boxing Promotions (JBBP) utyikitye ezinzalelwane zaseMpuma Koloni ukuba zilwele lentshinga eshiywe nguPhumelela ‘The Truth’ Cafu ozakulwa nentshatsheli yeWorld Boxing Organisation (WBO) kudidi lwejunior-bantamweight uKosei Tanaka waseJapan.
UCafu waseDuncan Village, eMonti, uzakucela umngeni kuTanaka eTokyo kwelaseJapan kwisithuba esingaphantsi kweenyanga ezimbini.
“Andipheli mandla nangona ndingaxhaswa nje ngamasebe onke ezemidlalo. Sibheka phambili, kwaye sikholelwa ukuba izenzo zethu zizakuthetha ngaphezu kwamazwi,” utshilo uBrice.
Kusenjalo, injinga yentambanni kwicandelo labasetyhini eNtshona Koloni uSimamkele Tutsheni uzakucela umngeni kwintshatsheli yoMzantsi Afrika kudidi lwejunior-featherweight uNomusa Ngema kuletumente enye. – Monwabisi Jimlongo
