Ludidi olutsha njengokuba owayeyinjinga yoMzantsi Afrika kudidi lweminimumweight uBangile Nyangani waseMthatha ezakubuyela eqongeni kulenyanga emva kokungalwi kwisithuba esingaphaya kweenyanga ezilishumi elinambini.
UNyangani akakalwi kususela mhla waphulukana nentshinga yoMzantsi Afrika ngethuba ebethwa nguSiyakholwa Kuse e-International Convention Centre (ICC), eMonti, ngoJulayi kulonyaka ophelileyo.
Emva koko, uNyangani, oqeqeshwa ngu-Alan Toweel eRhawutini, wenyukela kudidi lwempukane. Ngoku uzakulwa noNjabulo Buthelezi eBox Camp Booysens, eRhawutini, ngoLwesihlanu umhla wamashumi amabini kuSeptemba.
KwanjengoNyangani, naye uButhelezi uzakube esilwa okokuqala ukususela ngoJulayi walonyaka ophelileyo. Akakalwi kususela mhla wabethwa nguNkosingiphile Sibisi, oyinjinga yoMzantsi Afrika kudidi lwempukane.
