Ukuvelisa imbethi-manqindi yokuqala yasetyhini ephuma eNtshona Koloni nephumelele intshinga yoMzantsi Afrika lithuba lokuzingomba isifuba kumthelekisi ophambili eKapa uJackie Brice weJackie Brice Boxing Promotions (JBBP).
UNtombokuqala Tolashe, othelekiswa nguBrice, uphumelele intshinga yoMzantsi Afrika ebingenamntu kudidi losiba kwicandelo labasetyhini ebetha owayeyintshatsheli yelizwe uMatshidiso Mokatsane waseKroonstad, eFreystata, eVibrant Sport Centre, e-Ottery, eKapa.
“Ndenze imbali apha eKapa ngoLwesihlanu. SibenoTolashe obeyintshatsheli yokuqala kwicandelo labasetyhini eNtshona Koloni ukuphumelela intshinga yosiba. Lirekhodi elihle elo,” utshilo Brice.
Ngaphambi kokulwa noMokatsane, uTolashe ukhe wazama ukuphumelela intshinga yoMzantsi Afrika kudidi lwejunior-lightweight izihlandlo ezimbini. Wabethwa nguNozipho Bell kuyo yomibini loomilo leyo ngoJulayi 2021 nango-Okthobha 2022.
Kusenjalo, uBrice, owayengumgqatswa kuluhlu lokuba ngumthelekisi wonyaka kwiiSouth African Boxing Awards kulonyaka ophelileyo, uzakuba netumente yakhe yesihlanu ukususela ngoJuni ekuzeni kuphela kwalenyanga.
Inzalelwane yaseDuncan Village ezinze eKhayelitsha uLwando Mgabi uzakulwa noSihle Jelwana, owazalelwa kuKomani, kumlo wentshinga yoMzantsi Afrika engenamntu kudidi lwejunior-bantamweight, logama uSimamkele Tutsheni ezakucela umngeni kwinjinga yoMzantsi Afrika kudidi lwejunior-featherweight kwicandelo labasetyhini uNomusa Ngema.
“Sizakuba nemilo yentshinga yoMzantsi Afrika emibini ngomhla wamashumi amabini anesixhenxe kuSeptemba. ULwando Mgabi uzakulwa noJelwana, aze uTutsheni alwe noNgema. Ndophula amarekhodi. Yiyo lonto kuphela endizixhalabisa ngayo, kukuvelisa iintshatsheli,” utshilo uBrice.
“Andikhange ndifumane nesenti esuka nakowuphi na urhulumente. Ndizakuvelisa iintshatsheli, ndibonise abantu ukuba singayenza lento nokokuba asikhange sifumane nkxaso evela kurhulumente.” – Monwabisi Jimlongo
