IBafana Bafana iquthise iSouth Sudan ngamanqaku amathathu kwamabini kumdlalo wokuzibekela indawo kwitumente ye-Africa Cup of Nations ka-2025 eJuba National Stadium emva kwemini ngoLwesibini.
IiBright Stars zothuse iBafana ngethuba ziphala phambili emva kwenqaku likaTito Okello kwibhola ebisuka emlotheni ngomzuzu weshumi elinesihlanu.
Kuthabathe iBafana imizuzu emibini ukufaka inqaku lokulinganisa elifakwe ngu-Oswin Appollis wePolokwane City. U-Appollis ufake inqaku lakhe lesibini kanye ngaphambi kokuhlaba ikhefu.
IiBright Stars zifake inqaku lokulinganisa ngequza likaValentino Kuach Yuel ngomzuzu wamashumi amahlanu anesibhozo.
Kwanjengokuba ebenzile ngoLwesihlanu kuleveki ephelileyo, uThalente Mbatha uphindile kwakhona wabangumsindisi weBafana njengokuba ekhulule ngenyawo lasekhohlo ibhola yangcangcazelisa umnatha kwixesha elongezwe ngusompempe.
