IKaizer Chiefs iphumelele umdlalo wayo wesibini njengokuba iquthise AmaZulu ngamanqaku amathathu kwelinye kwiBetway Premiership eMoses Mabhida Stadium, eThekwini, ngokuhlwa kwangoLwesithathu.
Amakhosi akhawuleze aphala phambili ngamanqaku amathathu eqandeni kungaphelanga nemizuzu engamashumi amabini anesihlanu.
URanga Chivaviro ufake inqaku lokuqala leChiefs ngomzuzu weshumi elinambini, waze uGaston Sirino wafaka elesibini kwimizuzu emibini elandelayo. Ummi wase-Angola u-Inacio Miguel ufake inqaku lesithathu ngomzuzu wanashumi amabini anesithathu.
AmaZulu abuye ngendlela engummangaliso ekuqaleni kwesiqingatha sesibini. U-Etiosa Ighodaro waseNigeria ufake inqaku lAmaZulu kwimizuzu emibini siqalile isiqingatha sesibini.
Kusenjalo, iStellenbosch FC siswaze iCape Town City ngamanqaku amathathu eqandeni komnye umdlalo weBetway Premiership e-Athlone Stadium.
Amanqaku eStellies afakwe ngu-Andre de Jong, uFawaaz Basadien kunye noSanele Barns, obethelele isikhonkwane sokugqibela kumkhumbi weeCitizens.
