Njengokuba uMphathiswa weZemidlalo uGayton McKenzie ecele abantu bafake amagama abo abacinga ukuba bangangena kwibhodi kaBoxing South Africa (BSA), uLuxolo September ulibeke lacaca elokokuba yena akanamdla wokukhonza kwaBSA.
USeptember wayengomnye wamalungu ayekwibhodi kaBSA neyabhangiswa nguMcKenzie ekuthambekeni kwenyanga ka-Agasti.
Ukanti, lenzalelwane yaseNgqamakhwe yayililungu lebhodi kaBSA eyathintelwa ngempumelelo enkundleni yiNational Professional Boxing Promoters Association (NPBPA) ngoDisemba nyakanye.
“Andinawo umdla. Mabaqhubele phambili, andifumaneki mna. Awukwazi ukuqhubela phambili usenza into enye, uphinde ulindele iziphumo ezahlukileyo. Ndimnqwenelela amathamsanqa uMphathiswa noBoxing SA,” utshilo uSeptember.
Ngoku uSeptember, owayeyintatheli nozinze eCairo kwelaseYiphutha, ugxile kumsebenzi wakhe njengegosa eliphezulu kwiConfederation of African Football (CAF). – Monwabisi Jimlongo
