Akukhange konele ukudlala kakuhle kwe-Orlando Pirates ekuzeni kuphela komdlalo njengokuba ibethwe ngamanqaku amathathu kwamabini yiMagesi FC kumjikelo wokuqala weCarling Knockout e-Orlando Stadium, eSoweto, emva kwemini ngoMgqibelo.
Abatshakazi bafake inqaku labo lokuqala ngentloko kaDelano Abrahams ngomzuzu wamashumi amathathu anesithathu.
Izinto zibemandundu ngakumbi kwiPirates xa umdlali wasemva uThabiso Sesane efaka inqaku lesibini leMagesi emva kwebhola ebisuka kuTshepo Kakora kwicabanga lasekunene.
U-Edmore Chirambadare ufake inqaku lesithathu leMagesi kwixesha elongezwe ngusompempe emva kokuba unozinti wePirates uSipho Chaine oyisakele ukuyinkamfula ibhola ebisuka echaphazeni. Oku kwenzeke emva kokuba uSesane edlale uDeolin Mekoa kakubi ebhokisini.
IPirates ayikhange inikezele njengokuba idlale kakuhle kakhulu kwimizuzu elishumi yokugqibela yomdlalo. Amalinge ayo abeyimpumelelo ngethuba uKabelo Dlamini efaka inqaku lokuqala kushiyeke imizuzu emine uphele umdlalo. U-Evidence Makgopa ufake inqaku lesibini lePirates ngomzuzu wamashumi asibhozo anethoba.
