Ngelingeni uThulani ‘Evolution’ Mbenge uphinde wayiphumelela kwakhona intshinga ye-International Boxing Organisation (IBO) kudidi lwewelterweight kwisithuba esingaphaya kweminyaka emihlanu waphulukana nayo.
UMbenge uphumelele intshinga ye-IBO emva kokubetha uMichael McKinson wase-United Kingdom ngamanqaku eCopperbox Arena, eLondon, eNgilane ngokuhlwa kwangoMgqibelo.
Emva kwemijikelo elishumi elinambini, uMbenge, oneminyaka engamashumi amathathu anesithathu, uphumelele kubo bobathathu abagwebi. UBob Williams noGiulio Piras bathe uphumelele 116-112, logama uMikael Hook ethe uphumelele 117-111.
UMbenge, oyibambe kabini intshinga yoMzantsi Afrika kudidi lwewelterweight, waphulukana nentshinga ye-IBO emva kokubethwa liJamani uSebastian Formella kwelaseJamani ngoJulayi 2019.
