IPremier Soccer League (PSL) iqinisekise imihla, iindawo kunye namaxesha ezakuqala ngayo imidlalo yamaqela asibhozo okugqibela kwiCarling Knockout.
Lemidlalo izakudlalwa kulempelaveki ezayo, ngoMgqibelo umhla wesibini neCawa umhla wesithathu kuNovemba.
IPSL iphinde yabhengeza ukuba imidlalo yamaqela amane okugqibela izakudlalwa ngoMgqibelo umhla wethoba neCawa umhla weshumi kuNovemba, logama umdlalo wamagqibela kankqoyi ungomhla wamashumi amabini anesithathu kuNovemba.
IRichards Bay FC izakwamkela iCape Town City kumdlalo wokuqala wamaqela asibhozo okugqibela eKing Zwelithini Stadium, eMlazi, eThekwini ngentsimbi yesithathu kuloMgqibelo weveki ezayo.
Ukanti, iKaizer Chiefs izakudlala neMamelodi Sundowns eFNB Stadium, eNasrec, eRhawutini ngentsimbi yesithandathu malanga.
Mibini imidlalo ezakudlalwa ngemini elandelayo njengokuba i-TS Galaxy izakwamkela iMagesi FC eMbombela Stadium, eNaspoti, logama iMarumo Gallants izakudlala neStellenbosch FC eDr Molemela Stadium, eMangaung. Yomibini lemidlalo izakuqala ngentsimbi yesithathu.
