UMthokozisi Ngxaka uzise uvuyo kubalandeli bamanqindi eMthatha ngethuba esenza izinto zamehlo ngaphambi kokunqumamisa uSiphesihle Sityo kumjikelo wethoba kwitumente yeBBB Promotions ngokuhlwa kwangeCawa.
Ngenxa yaloompumelelo, uNgxaka, oshiye abantu bechwayitile kwiholo yaseMthatha, ubeyintshatsheli entsha yaseMpuma Koloni kudidi lweminimumweight.
USityo, oyinzalelwane yaseDuncan Village, uqale kakuhle kwimijikelo emibini yokuqala, kodwa izinto ziyaguquka ngethuba uNgxaka ebebonakala efudumele, ezenzela.
Kusenjalo, owayekhe walwela intshinga yentambanani kweli loMzantsi Afrika uLusizo Manzana ubuyele eqongeni ngokunqumamisa uSiphosethu Mhlahlo waseChintsa kumjikelo wesithathu kumlo wengabulazigcawu.
Ibingumlo wokuqala lenzalelwane yaseMthatha kususela mhla wenziwa uqhaqho lwegxalaba ebutsheni balonyaka.
Ezinye iziphumo:
UThimna Lingani ubethe uSisonke Matshoba ngamanqaku
Siphenathi Nobanda ulwe ngokulingana noMbulelo Gwabeni
Siphelele Maxwele ubethe uSakhekile Makhoba ngokumnqumamisa kumjikelo wesithathu
Okuhle Mthi ulwe ngokulingana noSinalo Mtolo
UNdikho Nyebe ubethe uMduduzi Mzimela ngamanqaku
UPhaphama Ronorono ubethe uTsumbo Mbedzi ngokumnqumamisa kumjikelo wokuqala
