Noko zehlile izibilini kuPeter Shalulile njengokuba efake amanqaku amabini ngethuba iqela lakhe iMamelodi Sundowns iquthisa iCape Town City ngamanqaku amathathu eqandeni kumdlalo weBetway Premiership eLoftus Versfeld, ePitoli, ngokuhlwa kwangoLwesithathu.
UShalulile uvule ngenqaku lakhe lokuqala ngomzuzu weshumi elinesithandathu kwibhola ebeyinikwe nguLucas Ribeiro Costa.
URibeiro, osuka eBrazil, uqinisekise ukuba wongeza amanqaku eeBrazilians ngethuba efaka inqaku lesibini ngomzuzu wamashumi amathathu anesixhenxe emva kwebhola ebivela kuKhuliso Mudau.
UShalulile waseNamibia ufake inqaku lakhe lesibini kulomdlalo kwimizuzu esixhenxe siqalile isiqingatha sesibini kwibhola ebisuka ku-Iqraam Rayners.
Kusenjalo, iKaizer Chiefs ize ngemva ngethuba idlala ngokulingana ngamanqaku amabini macala neMagesi FC ePeter Mokaba Stadium, ePolokwane.
Amanqaku eMagesi afakwe nguWonderboy Makhubu no-Edmore Chirambadare ngaphambi kokuba uMduduzi Shabalala ancede Amakhosi.
