UKaine ‘K9’ Fourie uzakuvavanya isakhono sakhe samanqindu xa esilwa nembethi-manqindi engekabethwa uWasiru Mohammed wase-Accra kwelaseGhana ngoMgqibelo umhla wamashumi amabini anesithathu kuNovemba.
UMohammed unconywa kakhulu njengokuba enqumamise amadoda alishumi elinambini kumaxhoba akhe alishumi elinesithathu. UMichael Akramah Tetteh lixhoba lokugqibela ukuva ulwamvila lukaMohammed njengokuba wamnqumamisa kumjikelo wesihlanu eBukom Boxing Arena Accra ngoJuni kulonyaka.
Kwelinye icala, uFourie unqumamise uSiseko Makeleni kumjikelo wokuqala ngethuba besilwela intshinga eyayingenamntu kwi-International Boxing Federation (IBF) Africa kudidi lwelightweight eBox Camp Booysens, eRhawutini, kumlo wakhe wokugqibela phantse kwiinyanga ezine ezigqithileyo.
UFourie, oqeqeshwa ligqala lomqeqeshi uGert Strydom, naye akakabethwa. Sele ephumelele imilo esibhozo, enqumamise amadoda amathandathu, waze walwa ngokulingana kwemibini.
