IChippa United izakudlala kwitumente ebizwa Home of Legends Cup eNelson Mandela Bay Stadium, eGqeberha, ngoMgqibelo kuleveki ezayo.
IiChilli Boys ziye zarhoxa kuletumente ebutsheni beveki, zityhola ngempatho-mbi ebisuka kwiMandela Bay Development Agency (MBDA).
Kodwa ngoku yonke into isonjululiwe emva kwentlanganiso phakathi kwengqonyela yeMBDA u-Anele Qaba nosihlalo weeChilli Boys uSiviwe ‘Chippa’ Mpengesi nto leyo ekhokelele ekubeni eliqela laseGqeberha libuyele kuletumente kukhutshelwa ngaphandle iCape Town City.
“Kungovuyo olukhulu ukubhengeza ukuba iingxoxo zizele amaduna namathokazi nto leyo ekhokelele ekubeni sifikelele kwisivumelwano,” itshilo iMBDA neeChilli Boys ngoLwesihlanu.
IiChilli Boys zizakudlala neMamelodi Sundowns kumdlalo wesibini ngentsimbi yokuqala emva kwemini, logama iKaizer Chiefs izakuqubisana neLamontville Golden Arrows ngentsimbi yeshumi kusasa.
