UZolisa Batyi usebenze nzima ngaphambi kokukhusela intshinga yoMzantsi Afrika kudidi losiba ebetha u-Abdul-aziz Kunert ngamanqaku e-Orient Theatre, eMonti, ngokuhlwa kwangoMgqibelo.
Kumlo apho zombini iimbethi-manqindi bezisebenzela impumelelo, uBatyi ukhusele intshinga yakhe ngempumelelo isihlandlo sesine kususela mhla wayihlutha kuJeff Magagane ngokumnqumamisa kumjikelo wesibini ngoDisemba 2022.
UBatyi noKunert balwa ngokulingana kumlo wabo wokuqala eCape Peninsula University of Technology (CPUT) eBellville, eKapa, ngo-Agasti kulonyaka ophelileyo.
Ibisisihlandlo sesithathu uKunert waseKapa elinga ukuphumelela lentshinga. Wabethwa ngu-Asanda Gingqi ngoSeptemba 2021, waze walwa ngokulingana noBatyi ngo-Agasti nyakenye.
Kusenjalo, owayeyinjinga yoMzantsi Afrika u-Aphiwe Mboyiya ubethe uLindokuhle Dlamini ngamanqaku kumlo wengabulazigcawu.
Ezinye iziphumo:
Athanathi Mxoli ulwe ngokulingana noQhamani Mhlana
U-Athenkosi Tunzi uquthise uXolani Mbatha ngamanqaku
USimamkele Singile ubethe uSibusiso Mkolo ngamanqaku
ULonwabo Velile ubethe Sonke Komeni ngokumnqumamisa kumjikelo wokuqala
UYomeleze Silulu ubethe uSiphosethu Matyholweni ngamanqaku
