Iphumile ingqina kukhangelwa imbethi-manqindi ezakulwa nowayesakuba yintshatsheli yoMzantsi Afrika u-Azinga ‘Golden Boy’ Fuzile e-Orient Theatre, eMonti, kuleCawa esiya kuyo.
UFuzile ebezakunyathelana ngoobhontsi no-Eduardo Mancito wasePhilippines. Kodwa lommi wasePhilippines, oneminyaka engamashumi amathathu anesibini, akakwazanga ukuza eMzantsi Afrika emva kokufumana istampu esigunyaza uhambo lwakhe emva kwexesha. Ngoku iziphatha-mandla zeLast Born Boxing Promotions ziphantsi phezulu, zikhangela umntu onokulwa noFuzile.
“Umntu ebesizakulwa naye uqale ngokusokola ngaphambi kokufumana istampu esigunyaza ukuba angahama azokulwa no-Azinga. Sinethemba lokufumana imbethi-manqindi ezakulwa noFuzile,” utshilo uMlandeli Tengimfene weLast Born Promotions.
Kubaluleke kakhulu ukuba alwe uFuzile, oneminyaka engamashumi amabini anesibhozo, njengokuba umlo olandelayo walenzalelwane yaseDuncan Village uzakuba ngoFebruwari okanye ngoMatshi kulonyaka ozayo.
