Ekurhoxeni kwembethi-manqindi yasePhilippines u-Eduardo Mancito ngenxa yokusifumana emva kwexesha istampu esigunyaza ukuba aze eMzantsi Afrika, abalawuli beLast Born Boxing Promotions bakhawuleze bafumana mntu wumbi ozakulwa no-Azinga ‘Golden Boy’ Fuzile.
Ngoku lentshatsheli yamhlamnene eMzantsi Afrika kudidi losiba izakulwa nenxele elineminyaka engamashumi amabini ananye u-Abdul Juma Kubira waseTanzania kumlo ophambili kwitumente ezakubanjelwa e-Orient Theatre, eMonti, kuleCawa esiya kuyo.
Njengokuba ephumelele kasibhozo, enqumamise amadoda amabini, wabethwa kabini, waphinda walwa ngokulingana kumlo omnye, uKubira ohlala eMalamba Mawali kwelaseTanzania, ugqibele ukulwa ngethuba esilwa ngokulingana noMubarack Denso Ramadhani eKemmon Hall, eDar-Es-Salaam, ngoMeyi kulonyaka.
Kusenjalo, sisihlandlo sesibini inxele laseDuncan Village, eMonti, nelineminyaka engamashumi amabini anesibhozo lisilwa kulonyaka. UFuzile, owakhe walwela intshinga yehlabathi, wanqumamisa imbethi-manqindi yaseNamibia uSebastianus Natanael kumjikelo wesithandathu kumlo owawubanjelwe e-Orient Theatre ngo-Agasti.
