Uwuqale ngendlela encomekayo umsebenzi wakhe umqeqeshi omtsha weMamelodi Sundowns uMiguel Cardoso njengokuba iiBrazilians zibethe iRaja Club Athletic ngenqaku elinye eqandeni kumdlalo weCAF Champions League eLoftus Versfeld ePitoli emva kwemini ngeCawa.
UCardoso, oqale ukusebenza kwiSundowns kwiintsuku ezimbalwa ezigqithileyo, unike izangxa zasePitoli impumelelo yazo yokuqala ngenqaku elifakwe ngu-Iqraam Rayners kwibhola ebisuka kuKutlwano Letlhaku.
URayners, obedlalela iStellenbosch FC kwisizini ephelileyo, sele efake amanqaku alishumi elinanye kwimidlalo elishumi elinesine kususela mhla wafika kwiiBrazilians.
